सवारी लाइसेन्सको सट्टा राष्ट्रिय परिचयपत्रले काम गर्ने

काठमाडौं । सरकारले सवारी चालक अनुमतिपत्र (लाइसेन्स)को सट्टा राष्ट्रिय परिचयपत्र अनिवार्य गर्ने तयारी गरेको छ ।

बुधबार राष्ट्रिय परिचयपत्र तथा पञ्जीकरण विभाग र यातायात व्यवस्था विभागबीच यससम्बन्धी समझदारीपत्रमा हस्ताक्षर भएसँगै अब सवारीचालकले लाइसेन्स नै बोक्नुपर्ने बाध्यता हट्ने सुनिश्चित गरेको हो।

यससम्बन्धी निर्णय मन्त्रिपरिषद्को गत जेठ २३ गतेको बैठकले गरेको थियो। त्यसपछि यही साउन ३ गते दुई विभागबीच राष्ट्रिय परिचयपत्र व्यवस्थापन प्रणालीको विद्युतीय सेवा प्रयोग गर्नेसम्बन्धी समझदारीपत्रमा हस्ताक्षर भइसकेको छ।

लाइसेन्स परीक्षणका लागि ट्राफिक प्रहरीले प्रयोग गर्ने सफ्टवेयरसमेत तयार भइसकेकाले अब यसको कार्यान्वयनको सबै आधार तयार रहेको विभागले जनाएका छ।

यो निर्णय कार्यान्वयनमा आएपछि लाइसेन्सको पर्खाइमा रहेका लाखौँको समस्या समाधान हुनेछ। लिखित र ट्रायल पास गरिसकेका करिब १६ लाख नागरिक अहिले सवारी लाइसेन्सको पर्खाइमा छन् । नयाँ र नवीकरण गर्न दिएका सेवाग्राहीले दुई वर्षभन्दा बढी समयदेखि लाइसेन्स पाउन सकेका छैनन् ।