रास्वपाको राष्ट्रिय भेला असोजमा

काठमाडौं । राष्ट्रिय स्वतन्त्र पार्टी (रास्वपा)को राष्ट्रिय भेला असोजमा हुने भएको छ। बुधबार वनस्थलीस्थित केन्द्रीय कार्यालयमा बसेको सचिवालय बैठकले असोज १ र २ गते काठमाडौंमा भेला गर्ने निर्णय लिएको हो।

साउन १९ गते रास्वपाको बन्द कार्यशाला (क्लोज क्याम्प)ले आगामी ३ र ४ असोजमा राष्ट्रिय भेला र ०८२ वैशाख तेस्रो साता राष्ट्रिय महाधिवेशन गर्नेसहितका सुझाव दिएको थियो। सोही सुझावका आधारमा रास्वपाले राष्ट्रिय भेलाको मिति तय गरेको हो।

राष्ट्रिय भेलामा सभापतिको राजनीतिक प्रतिवेदन, विधान संशोधन प्रस्ताव र क्लोज क्याम्पका सुझावलाई एजेन्डाका रूपमा छलफल गर्ने तय भएको बताइएको छ । राष्ट्रिय भेलाअघि सातै प्रदेशको भेला गर्ने निर्णयसमेत बैठकले गरेको छ।