कर्णालीमा २३ हजार मेट्रिक टन खाद्यान्न अपुग

कर्णाली । कर्णाली प्रदेशमा वार्षिक २३ हजार मेट्रिक टनभन्दा धेरै खाद्यान्न अपुग हुने गरेको पाइएको छ । प्रदेशमा वार्षिक २३ हजार ४३४ मेट्रिक टन खाद्यान्न अपुग हुने गरेको कर्णाली प्रदेश भूमि व्यवस्था कृषि तथा सहकारी मन्त्रालयले जनाएको छ।

कर्णालीमा वार्षिक तीन लाख २० हजार ८९० मेट्रिक टन खाद्यान्न उत्पादन हुन्छ। राष्ट्रिय जनगणना २०७८ अनुसार यहाँको जनसंख्या १६ लाख ८८ हजार ४१२ छ। यसलाई आधार मान्दा कर्णालीमा वार्षिक एकजनालाई २०१ किलो खाद्यान्न आवश्यक पर्छ।

कर्णालीलाई पूर्ण रूपमा खाद्यान्नमा आत्मनिर्भर हुन तीन लाख ४४ हजार तीन सय २४ मेट्रिक टन खाद्यान्न आवश्यक पर्ने कृषि विकास निर्देशनालयले जनाएको छ। जिल्लागत रूपमा सल्यान, दैलेख र सुर्खेत खाद्यान्नमा आत्मनिर्भर भए पनि अन्य सात जिल्लालाई आफ्नै उत्पादनले वर्षभर धान्न सक्ने अवस्था छैन।

डोल्पामा वार्षिक पाँच हजार ९९ मेट्रिक टन खाद्यान्न अपुग छ। हुम्लामा आठ हजार ५६५, मुगुमा छ हजार ४३९, जुम्लामा तीन हजार पाँच मेट्रिक टन खाद्यान्न वार्षिक अपुग हुने गरेको छ।

सबैभन्दा धेरै कालीकोटमा १० हजार ३१७ मेट्रिक टन वार्षिक रूपमा खाद्यान्न अपुग हुँदा रुकुमपश्चिममा एक हजार ६१५ र जाजरकोटमा चार हजार २९९ मेट्रिक टन खाद्यान्न अपुग हुने गरेको छ।