गुगल, मेटा, एप्पलसहितका कम्पनीले नेपालमा तिरे ३६ करोड कर

काठमाडौं । नेपालमा विद्युतीय माध्यमबाट शुल्कसहितको सेवा दिइरहेका १८ कम्पनीबाट सरकारले गत आर्थिक वर्षमा ३६ करोड रुपैयाँ कर उठाएको छ । ठूला करदाता कार्यालयका अनुसार आर्थिक वर्ष २०८०र०८१ यस्ता कम्पनीले ३५ करोड ८२ लाख ५० हजार रुपैयाँ कर बुझाएका छन्।

गत आर्थिक वर्षमा नेपालमा एडोबी, नेटफ्लिक्स, जोहो, गुगल डिजिटल, प्रोमेट्रिक जापान, इब्को इन्टरनेसनल, एसएससीए, पियर्सन एजुकेसन, एनसीएच, एप्पल डिस्ट्रिब्युसनलगायतका कम्पनी नेपालमा दर्ता भएका थिए । गुगल एसिया, एनसीएच पियर्सन, लिंक्डइन सिंगापुर, मेटा र माइक्रोसफ्ट त्यसअघि नै नेपालमा दर्ता भइसकेका थिए।

डिजिटल सेवा करसम्बधी कार्यविधि, २०७९ अनुसार नेपालमा इन्टरनेटका माध्यमबाट शुल्कसहितको सेवा दिने र २० लाख रुपैयाँभन्दा बढीको कारोबार गर्ने विदेशी कम्पनी ठूला करदाता कार्यालयमा दर्ता हुनुपर्छ । त्यस्ता कम्पनीले नेपालबाट गरेको आफ्नो आम्दानीको २ प्रतिशत कर सरकारलाई तिर्नुपर्छ।