को हुन् प्रधानसेनापति बन्न लागेका अशोकराज सिग्देल ?

काठमाडौं । नेपाली सेनाको ४५औँ प्रधानसेनापतिका रुपमा बलाधिकृत रथी अशोकराज सिग्देलले जिम्मेवारी सम्हाल्दै छन् । मन्त्रिपरिषद्को सिफारिसमा राष्ट्रपति रामचन्द्र पौडेलले साउन २५ गतेदेखि लागू हुने गरी सिग्देललाई कामु प्रधानसेनापतिको जिम्मेवारी तोकेका छन् ।

प्रधानसेनापति प्रभुराम शर्माको तीनवर्षे पदावधि सकिएर आगामी भदौ २४ गतेदेखि अनिवार्य अवकाश हुँदै छ। सिग्देलले ज्येष्ठताका आधारमा कामु प्रधानसेनापतिको जिम्मेवारी पाएका हुन्।

प्रधानसेनापति अवकाश हुनु एक महिनाअघि बिदामा बस्ने अभ्यासअनुसार सिग्देलले कामुको जिम्मेवारी पाएका हुन्। नेपाली सेनामा वरिष्ठ रथी प्रधानसेनापति बन्ने प्रचलनअनुरूप सिग्देल नै प्रधानसेनापति बन्नेछन् ।

तनहुँमा जन्मिएका सिग्देलको स्थायी घर भैरहवा हो । सिग्देल २०४३ को ब्याचका सेकेन्ड लेफ्टिनेन्ट हुन् । उनी २५ बेसिकका एक नम्बरमा सेकेन्ड लेफ्टिनेन्ट भएका थिए । हायर कमान्डमा पनि सिग्देल एक नम्बरमा थिए ।

आर्मी कमान्ड एन्ड स्टाफ कलेज शिवपुरी र चीनको नेसनल डिफेन्स युनिभर्सिटीबाट स्नातक गरेका उनले आर्मी वार कलेजमा हायर कमान्ड एन्ड म्यानेजमेन्ट कोर्स र भारतबाट डिफेन्स म्यानेजमेन्ट कोर्स पूरा गरेका छन् । त्रिभुवन विश्वविद्यालय र चीनको राष्ट्रिय रक्षा विश्वविद्यालयबाट रणनीतिक अध्ययनमा स्नातकोत्तर उपाधि हासिल गरेका छन् ।

काउन्टर इन्सर्जेन्सी र जङ्गल वारफेयर स्कूलको कमान्डेन्ट, इन्फन्ट्री ब्रिगेड र डिभिजनको कमान्ड गरेको अनुभव छ । सिग्देलले सन् २०२२ मा अमेरिका–नेपाल तेस्रो ल्यान्ड फोर्स वार्ताका लागि नेपाली सेनाको प्रतिनिधिमण्डलको पनि नेतृत्व गरेका थिए ।

अन्तर्राष्ट्रिय क्षेत्रमा संयुक्त राष्ट्र शान्ति सेनाअन्तर्गत पूर्व युगोस्लाभिया, ताजिकिस्तान र लाइबेरिया जस्ता चुनौतीपूर्ण स्थानमा सेवा गरिसकेका छन् ।

सैनिक जीवनको उत्कृष्ट सेवाको कदरस्वरुप उनी सुप्रबल जनसेवाश्री तेस्रोसहित विभिन्न राष्ट्रिय तथा अन्तर्राष्ट्रिय पदकबाट विभूषित छन्। सङ्गठनको उन्नयनमा उत्कृष्ट योगदान पुर्‍याएबापत उनले दुईपटक ‘प्रधान सेनापति प्रशंसा पदक’समेत पाएका छन् ।